Kên véĥét aʾvar, keyítmeş fi taréq rôĥu. Mê ke fi eĥet ke yímsék mín îdu. Gelʿu u ĥís lé ke yísmeĥ mín ĥeveleyu ke îʿévínu fíl meşu.
Él aʾvar, síméĥ ĥís véĥét u sekkén. Él ĥís kên lé véĥét meşlul. Aʾvar, bílğalat ke kíddês ʿele ícru. Mefluç beʿet şavt nídém ʿele lé kílqêl. Levre lé ke kí’d díʿés fiyu u dês ʿele ícru kên aʾvar.
Aʾvar ul meşlul beʿet él qeşmé sâru lekêti. Karral aʾvar ísteğbér,meşlul ĥeke; karral meşlul ísteğbér íl aʾvar ĥeke. Exri ĥebbu baʾwén u baqa îşu mê baʾwén.
Yavmíl véĥét meşlul qêl şel aʾvar:
-Fi maʿârıwna íjneyné fiye tômâni ínné keme’l ʿesel. Îwubu fíl fím. Ene meşlul atışşén u mô tiq aroĥ eşil mínnén şi.
Aʾvar kílfíĥék kílqêl:
-Şeyş ítqílli ku ıttış ene aʾvar ʿeyney mô îtışşu şi.Mô tiq aroĥ eşil mínnén.
Meşlul kílqêl şel aʾvar:
-Ínt ıttiq títmeş u ene atiq arvikí’t taréq. Teʿe ínʿévén baʿıwna u ınroĥ líjneyné. Nêkél mín âkí’t tômâni u ínfiş íffedne. Ínt íĥmílni ene darvikí’t taréq.
Aʾvar kítxemmém gemşé u kílqíbél.Aʾvar kílĥemelíl meşlul u ífneynítén kíttaraqu kés líjneyné.Meşlul kíttaloĥ mê fi şi eĥet fi líjneyné. Ífneynítén bílxef kíddexelu líjneyné.Íssêvi kílrâĥu râs sıcarıtı’t tômâni.Kíllemmu ímmele tômâni. Aʾvar kíssâr ícér şel meşlul. Meşlul kíssâr ʿeyn şel aʾvar.Hem kílekelu u hem kílgerev ʿele baʾwén.
Héş ku ínné fíl ekél ul geri, nâtor kílqamaş ífneynítén mín zîqén. Íşqat lé kítwelwílu mê kíttâqu xalsu rôĥén mín îtí’n nâtor.Íssêvi kílveddêhéníl meĥkemé.
Qâwi eşem kílara maʿârıwu aʾvar ul meşlul kítʿeccép.Nâtor kílĥekêhul mes’elé.
Aʾvar kílqêl:
-Ene mêli şi qabâĥa.Kuttışşu ĥêlíti.Ínke él meşlul mê ke îseyli beĥs él líjneyné ene mín esep díke êci él ĥêlé?”
Él karra meşlul kílbede yígri u kíddêféĥ rôĥu:
-Enemmé vaziyíti iyé dêmíl ʿeyn. Ínke él aʾvar mê ke yíĥmílni u îveddîni líjneyné ene íş şíğli kênét dêmíl meĥkemé u dêmíl qâwi?”
Qâwi beʿet lé kístanat ʿele ífneyníténímmé kílʿata ĥíkém dénbelé ífneyníténímmé líhén sehém fi él qabâĥa u kílamar kílddekku ífneníteénímmé.
Tûfé tûfé íntemmétíl ĥenterûfé!